Plattdeutscher Stammtisch

In de Kreisbökerie gifft dat siet’n poor Johren plattdütsche Vörlesungen mit Gesang ünner den Naam „Dit un dat op Platt“. Bärbel Bierend un ehr Rietfiedellüüd sorgt dor för Stimmung.

In’n Harfst 2014 harr Bärbel Bierend bi eene vun ehre Lesungen eene Idee:

Se wull sik gern mit nette Lüüd drapen to’n Plattsnacken; eenfach över Gott un de Welt klönen, villicht ne Tass Kaffe dorbi, sik nett ünnerholen.

De Idee keem goot an! Bi dat erste Drapen in de Kreisbökerie an’n 14.3.2015 keemen glieks fiefuntwintig Plattsnacker, un de plattdütsche Stammdisch mit Namen „Plattform“ weer geboren. Erst dreepen se sik in de Kreisbökerie, denn ok in’t DRK-Plegeheim un Eutiner Lokale.

Siet März 2016 hett de Stammdisch sien fastet Tohuus funnen. In’n „Lichtblick“ bi Madlen Schröder kümmt de „Plattform“ eenmol in’n Maand tosamen. Un de Plattsnacker- meist sünd dat so teihn bet föffteihn Lüüd -  föhlt sik dor so richtig wohl. In nette Runnen ward vertellt, vörlest, manchmol ok sungen, gifft ümmer’n Stück Koken un Tass Kaffe dorbi.

Wer Lust hett op’n netten Klönsnack is vun Harten inlaadt.

Bärbel

Unsere Gruppe hat die maximale Größe erreicht. Wenn Sie Interesse an unserem Stammtisch haben, melden sie sich bitte bei Frau Bärbel Bierend an, um auf die Warteliste zu kommen.